Ís í misgóðu veðri

Það er nú bara ekkert sumarveður hér eiginlega. Eiginlega bara frekar grár júní. Ég held í vonina um að það fari nú að breytast. Ég er farin að þrá að geta látið líða úr mér flatri á svalagólfinu, svona rétt uppúr hádegi með D-vítamín inntöku í botni. Við erum samt ekki að spara sumarhegðunina. Sokkarnir fá að mestu að liggja ofan í skúffu og svo fórum við í uppáhalds ísbúðina um daginn. Eiginlega var það þannig að við stálumst bara 3 þangað. Bara við og Bjútíbína. Henni fannst ísinn svo góður, mmmm.

Hjálpaði meira að segja pabba sínum að borða sinn ís. Ísbúðin er flott út í gegn! Starfsfólkið er flott og flott klætt. Ísinn er bæði flottur og svakalega góður. Útisvæðið, þar sem hægt er að sitja er líka flott. Og svo er flott hvernig þau tækla það að halda umhverfinu í kringum ísbúðina hreinu. Ég er ekki að tala um bara tveggja metra radíus. Það skiptir auðvitað nágrannana máli að það séu ekki ísdollur, plastskeiðar og servíettur allstaðar í hverfinu, svo ísbúðin hefur sett upp ruslatunnur og skilti á hinum og þessum stöðum og biður fólk að vera ekki með sóðaskap. Ein tunnan er langt, langt frá. En einmitt í þeirri fjarlægð frá ísbúðinni sem það sirka tekur að borða einn ís. Sniðugir.

Fórum að hjóla um daginn, þarna í fjarska eru strákarnir og Bjútíbína með Eiginmanninum. Kusurnar eru komnar í Naturparken. Þær fórum við auðvitað að heimsækja. Bjútíbína gargaði “mjáááááá” á þær. Þeim var alveg sama.

Þrátt fyrir að það sé grátt og aðeins of mikil rigning fyrir minn smekk þá er samt rífandi uppskera í gróðrarstöð félagsbúsins. Þarna á disk er hellingur af rósmarín, sem nú er í þurrkun, kóríander, oreganó og sítrónugras. Ég bíð spennt eftir að eignast minn eigin alvöru garð. 
Töluvert að gera í Fjárhúsinu mínu. Þarna er ég að fara með pantanir í póstinn. Mér finnst nú alveg smá rómantík yfir því að hjóla með þær í körfunni á hjólinu mínu.

Annars er allt bara í góðu gengi. Sumarfrí í skólum byrjar á föstudaginn. Á mánudaginn í vuggestuen. Ég er alveg á haus í vinnunni, það hafa hrúgast inn verkefni og ég er spennt yfir því. Kannski það muni verða til þess að ég geti hætt að skúra. Ég er nefnilega pínu þreytt á því að vinna frá 8 á morgnana til miðnættis.