Jágh.. ekki ætla ég að halda út einhverju vælu, velgju, væmnisvellubloggi hér. Mér er skapi næst að blóta duglega í skrifuðu máli og garga fram af svölunum, báðum megin, að allir hér í DK séu hálfvitar. Og útaf því að ég ætla ekki að halda úti væmnisbloggi þá ætla ég ekki að fara einni góðri hugsun um neðanskrifað:

Svona í morgunsárið á þessum annars ábyggilega fallega degi, sem ég fæ trúlega aldrei að sjá vegna þess hvað ég er mega reið og ..reið, kemur það í ljós að hjóli Sprengjunnar hefur verið stolið. Í ALVÖRU. Má ekkert liggja í sekúndu neinstaðar, sem heitir hjól, í þessu landi að þá er það bara hirt?

Ég er mest fúl því fyrir mánuði síðan var hjólinu Frumburðar stolið, þannig að hvorugt eldri barna hefur hjól.  Sem betur fór, fyrir hann, hafði mér ekki tekist að selja gamla hjólið hans svo hann hefur tuðrað um á því síðan.

Á ég að segja þér annað?.. Af okkur hefur líka verið stolið hvorki meira né minna en 3 Christiania hjólum og hjólinu hans Bónda. Þetta gera samtals rétt um 66 þúsund danskar krónur en verst er að komast ekki ferða sinna. Við erum ekki á bíl og það kostar fúlgur að nota aðrar samgöngu leiðir.. og var ég búin að nefna hversu ég elska að hjóla?? og hvað það er þægilegt að geta bara þeyst um á sínum hjólhesti án þess að þurfa að starta neinu tæki eða bíða eftir öðru og sitja þar inni með sveittu og hóstandi fólki OG borga fyrir það. FNUSSS.

Ég hef sagt það áður og segi það enn, hætt þú að stela hjóli og þá eru kannski líkur á að ég og mínir áhangendur fáum að hafa okkar hjól í friði. Ég var búin að þusa yfir því að landar mínir virðast halda að það sé í lagi að koma hingað til lands og taka bara eitt eða annað hjól. Það stendur ekki á hjólum, sem kannski óvart eru ólæst (já viti menn og konur, fólk getur gleymt að læsa hjólinu rétt eins og að læsa lyklana inni í íbúð eða hreinlega gleymt að sækja börnin í skólann, shit happens) s.s það stendur ekki á ólæstum hjólum “halló vegfarandi, taktu mig”. Og rúsínan í pylsuendanum er : Það er ekki í lagi að taka bara hjól. Ég get bara alls ekki verið sammála þessari kenningu. Mér finnst hún bara vera rugl og óþroskað að hugsa svona …og hananú.

Ég vill ekki fá eitt einasta komment um að ég eigi ekki að vera svona fúl, að ég eigi að líta á björtu hliðarnar því ég hafi ekki lent í lífsmarkandi (já, ég bý til orð þegar mér sýnist) áfalli. Ég á nefnilega ekki í neinum erfiðleikum með að skilja að aðrir geta haft það öðruvísi en ég (og ég ber fulla virðingu fyrir erfiðleikum annarra, bara svo það sé á hreinu), en ég get ekki skilið að mín vandamál þurfi, fyrir einhverja töfra, að eyðast út bara því nágranninn hefur það eftir einhverjum staðli (hver bjó þennan staðal til) verra en ég. ÉG ER BRJÁLUÐ!!!…!!!

… ég hef þá aftur opnað hinn, nú að verða, títtnefnda styrktar reikning Félagsbúsins.